Sechaba se tla hopola hore ka Pulungoana 2007, Banka e Kholo ea Lesotho e ile ea etsa kopo e potlakileng ’me eo Lekhotla le Phahameng le ileng la e fana e se e le Taelo khahlanong le Millennium Goal Society.  Har’a tse ling, Taelo ena ea Lekhotla e ne e lumella Banka e Kholo, ka PriceWaterHouseCoopers (PWC):

(i)              Ho fuputsa boleng ba chelete e nkuoeng ke Millennium Goal Society sechabeng, ka thoko ho Molao oa Financial Insitutions Act (FIA) 1999;

(ii)            Ho fumana ka botlalo, mabitso a batho bohle ba tsetetseng ho Millennium Goal Society;

(iii)           Ho fumana moo Millennium Goal Society e bolokileng lichelete tsena teng, e le chelete kapa thepa (assets) e rekiloeng ka tsona;

(iv)           Ho fa Mookameli e Moholo (Governor) oa Banka e Kholo ea Lesotho matla a ho hlahloba taba efe kapa efe eo, ho ea ka maikutlo a hae, a bonang eka e bohlokoa ho thuseng hore sechaba se tle se buseletsoe lichelete tsa sona tse nkuoeng ke Millennium Goal Society.

Sechaba se tla hopola hape hore Millenium e ne e ile ea kopa Lekhotla ho thibela Banka e Kholo ho tsoela pele ka lipatlisiso, e itšetlehile ka hore ho ne ho se na mabaka a hore Banka e hlahlele nyeoe e potlakileng (ex parte) ka la 27 Pulungoana, 2007, e sa feng moikarabelli monyetla oa ho ikarabella.  Lekhotla le ile la qhala nyeoe eo ’me la laela hore lintlha-kholo tsa tsekisano pakeng tsa Banka le Millennium li tlo buuoa ka la 19 Motseanong 2008,  ‘me le mahlakore ao a mabeli a eo hlaha Khotla ho thetha nyeoe.

Letsatsing la la 19 Motšeanong, Lekhotla le ile la tsebisoa hore Banka e Kholo le Millennium Goal Society li fihletse Tumellano e tla tataisa lipatlisiso holim’a Millennium. Lekhotla le ile la ananela Tumellano ena ’me la e fetola Interim Consent Order, ho bolelang hore e se e le Taelo ea Lekhotla.

Tlas’a Taelo ena, Banka e Kholo, ka PriceWaterHouseCoopers, e fuoa matla a ho ithuta ka botlalo litaba tsa botseteli tsa Millennium Goal Society. Haholo-holo, Banka e fuoe matla a ho kopana le batho ba tsetetseng le eona Millennium, ka sepheo sa ho fumana tse latelang:

(i)              Ho ikhotsofatsa ka boitsebiso ba batseteli;

(ii)            Litokomane tse feletseng tsa batseteli tse pakang hore ba tsetetse Millennium, le bopaki ka li-receipt ho pakahatsa hore esale ba tšela chelete ea bona moo;

(iii)           Libukana tsa libanka tsa batseteli

Mosebetsi ona oa boithuto o tla etsoa libakeng tse latelang:  Maputsoe, Maseru, Botha-Bothe, ha Seshote, Mokhotlong, Mafeteng, Quthing, le Thaba-Tseka.  Banka e Kholo e tla etsa phatlalatso matsatsing a seng ka tlase ho leshole le metso e mene (14) pele tšebetso ena e thakhoha, libakeng tse boletsoeng.  Liphatlalatso tse joalo li tla etsoa ka likoranta/maselinyana, le ka li-ea-le-moea, ‘me li supa libaka tseo mosebetsi ona o tlang ho etsetsoa teng, le matsatsi le linako tsa teng.

Ha liphuputso li phethahetse, le batseteli ba netefalitse boteng ba mabitso a bona le ho nepahala hoa lichelete tseo ba li tsetetseng, Banka e kholo e tla fana ka tlaleho ho Lekhotla, e le ho lokisetsa nyeoe e tlang ho buuoa ka lona letsatsi leo la la 23 Loetse, 2008.

Sechaba se kupuoa ke hona ho lula se thehile tsebe le ho nyakurela maselinyana e le hore ba tle ba tsebe ka nako ha mosebetsi ona oa bohlokoa o thakholoa libakeng tsa habo bona.

27 Motšeanong, 2008